Премиерот на полноќна литургија во Тетово

По повод големиот христијански празник Воскресение Христово Велигден, претседателот на Владата на Република Македонија, Никола Груевски вечерва ќе присуствува на свечената полноќна Велигденска литургија во Соборниот храм Свети Кирил и Методиј во Тетово, информираат од владиниот Сектор за односи со јавноста.

Премиерот Груевски денеска испрати честитка до сите православни верници на кои им го честита големиот христијански празник.

-Денес сите ние се издигнуваме над искушенијата, го славиме спасението и богоугодниот пат, пред невредностите. Нека секоја христијанска душа во овие моменти се потсети на праведноста, љубењето на ближниот и ја пронајде среќата во секоја подарена насмевка, подадена рака и спокоен збор. Во исто време, да си посакаме од нашиот Бог, да ни помогне и да не насочи и поучи во сите наши искушенија. Ние сме народ кој знае да го чествува Велигден и сите наши празници, како што знае и да се справува со предизвици. На овој спасоносен ден, да посакаме Бог да ни дарува сили за нови успеси, да истраеме во искушенијата, да го зачуваме духовниот мир и националното достоинство, зашто така ни доликува како на богољубив и човекољубив народ, да покажеме единство во верата, единство во државата, да си се почитуваме себеси, да ги почитуваме нашите роднини и пријатели, да ги почитуваме нашите соседи и сограѓани, да си ја сакаме и да работиме за изградба на силна и модерна Македонија. Нека ни е честит Велигден и за многу години! Христос Воскресна - Навистина Воскресна!, се вели во честитката од премиерот Груевски упатена до поглаварот на МПЦ г.г. Стефан и до православните верници.