Катастрофа: Од силниот ветер падна воинот од коњ

Силниот ветер што се појави пред малку во Скопје, сруши дел од споменикот Воин на коњ на плоштадот Македонија

Катастрофална глетка на скопскиот главен плоштад. Македонската гордост наместо на својот коњ, лежи паднат во фонтаната под споменикот. Влошувањето на временските услови и силниот ветер срушија дел од споменикот Воин на коњ. Горниот дел од телото на Александар е паднат во фонтаната. Неколкуте минувачи на празниот плоштад во недела наутро немо стојат пред ужасот кој се случи пред неполни пет минути. Среќа во несреќа е што во моментот на откачувањето на делот немало луѓе околу фонтаната. Нема повредени, но целиот плоштад е преплавен со метални пари кои од силниот удар на металното тело беа исфрлени од фонтаната. "Ја сликав девојка ми со споменикот во позадина. Стоевме блиску до летниковецот и брзав да ја сликам што побргу за да заминеме од невремето што надоаѓа. Не можев да поверувам од она што го видов, прво во екранот на апаратот, а потоа и со сопствени очи. Се слушна силен трескот и врискотници", кажува еден очевидец додека го смируваат со вода и шеќер во едно од околните кафулиња на плоштадот. АПРИЛИ-ЛИ-ЛИ